Bota/Rajoni

Tubim masiv në Podgoricë, malazezët në “mbrojtje të pavarësisë”

Tubim masiv në Podgoricë, malazezët në “mbrojtje të pavarësisë”
21:55 | 06 Shtator 2020

Në Sheshin e Pavarësisë në Podgoricë po mbahet “tubim patriotik”, për siç thanë organizatorët, mbrojtjen e Malit të Zi si shtet të pavarur.

Qytetarët nga komunat e tjera kanë arritur në kryeqytetin malazez, ku dhe u krijuan kolona të gjata veturash, që bartnin protestuesit.

Tubimi, siç u tha, u organizua nga një grup i organizatave patriotike malazeze. Policia nuk tha nëse është lejuar ky tubim dhe cilat janë organizatat patriotike që qëndrojnë pas këtij organizimi.

Ftesë për dalje në këtë tubim ka bërë Partia Demokratike e Socialistëve, e presidentit malazez, Millo Gjukanoviq, përmes platformave zyrtare të partisë.

Më 1 shtator, zëdhënësi i kësaj partie, Millosh Nikoliq tha se partia nuk ishte organizatori i tubimit, por se ishin “organizata të caktuara patriotike” që nuk ishin të lidhura me partinë.

Koalicioni opozitar “Për Ardhmërinë e Malit të Zi”, i udhëhequr nga Fronti Demokratik pro-serb, tha më 5 shtator se, sipas informacioneve që posedojnë, incidente me “pasoja tragjike” mund të ndodhin në “tubimin patriotik” dhe se udhëheqësit e ndërmarrjeve publike dhe ata që janë pranë Partisë Demokratike e Socialistëve, “po detyrojnë punonjësit të marrin pjesë në tubim”. Koalicioni u bëri thirrje mbështetësve të tij që të qëndrojnë në shtëpi.

Të dielën, drejtoria e policisë njoftoi se nuk kishte ndonjë informacion se mund të kishte incidente ose prishje të rendit dhe paqes në tubimin në Podgoricë.

Një tubim i ngjashëm u organizua më 3 shtator në Cetinje. Ky është tubimi i dytë që po mbahet në Podgoricë që nga zgjedhjet e 30 gushtit, në të cilin partia e Millo Gjukanoviqit humbi shumicën e saj në parlamentin malazez pas 30 vjetësh.

I pari u mbajt para Kishës së Ringjalljes së Krishtit, gjatë kremtimit të fitores zgjedhore të opozitës, në natën e 1 shtatorit, ku të pranishmit mbajtën flamuj dhe kënduan këngë serbe dhe brohoritën për Serbinë dhe Kosovën.

Gjatë festimit të fitores zgjedhore të tre koalicioneve opozitare, policia raportoi për rritje të incidenteve dhe tensioneve ndëretnike, veçanërisht në Plevle.

Opozita akuzoi policinë dhe partinë e Gjukanoviqit se ishin prapa provokimeve të incidenteve, në mënyrë që t’i jepnin një kontekst negativ fitores së opozitës në zgjedhjet e 30 gushtit, por një akuzë e tillë, u hodh poshtë nga partia e Gjukanoviqit.

Komisioni Shtetëror i Zgjedhjeve ka shpallur rezultatet paraprake të zgjedhjeve parlamentare të mbajtura në 30 gusht. Tri koalicionet e opozitës fituan më shumë se gjysmën e vendeve në përbërjen e ardhshme të parlamentit të Malit të Zi.

Nga 81 vende, Partia Demokratike e Socialistëve e drejtuar nga Millo Gjukanoviq fitoi 40 vende me partitë e pakicave dhe partnerët tradicionalë, ndërsa tre parti të opozitës fituan 41 vende.

Në MINIMAX kanë filluar zbritjet finale me çmime fikse 2€, 5€, 7€, 9€

Të tjera