Tajlanda ka raportuar për rastin e parë të bartjes lokale të koronavirusit në 100 ditë, pasi një i burgosur është konfirmuar se është i infektuar me COVID-19, shkruan “The Guardian”.

Një 37-vjeçar, që punon si DJ, ka testuar pozitiv në qendrën shëndetësore në burg. Dhjetëra kontakte janë testuar, përfshirë anëtarët e familjes, njerëzit që i ka takuar në gjyq dhe të burgosurit tjerë. Ai është arrestuar për drogë më 26 gusht.

Tajlanda kishte 100 ditë pa regjistruar rast të ri me koronavirus, dhe nuk është e qartë se si është infektuar i burgosuri. Rasti i fundit i brendshëm ishte më 24 maj.

Shteti ka arritur të menaxhojë mjaft mirë pandeminë, ndonëse kryeqendra Bangkoku, është një nga qytetet më të vizituara në botë. Që nga janari, kur Tajlanda u bë shteti i parë jashtë Kinës që regjistroi rast me COVID-19, janë regjistruar 58 të vdekur nga virusi në këtë shtet aziatik.

Masat e mbylljes të prezantuara në mars, janë lehtësuar dhe bizneset janë rihapur. Mirëpo mbesin në fuqi masat strikte në kufi. Tajlandezët që kthehen nga jashtë duhet të kalojnë 14 ditë në karantinë, ndërsa turistët nuk lejohen të futen në vend.