Dy persona janë vrarë dhe dymbëdhjetë të tjerë janë plagosur ose lënduar në Karolinën Veriore të Shteteve të Bashkuara mbrëmjen e kaluar.

Pesë nga personat e lënduar u goditën nga veturat përderisa po iknin nga sulmuesit e armatosur, shkruan “Daily Mail”, transmeton Gazeta Express.

Policia shkoi në rrugën “Beatties Ford” në pjesën veriore të qytetit Charlotte, ku gjeti qindra njerëz në rrugë. Një grua u shpall e vdekur në vendin e ngjarjes, ndërsa një person tjetër vdiq më vonë në spital.

Mediet lokale raportojnë se së paku gjashtë nga dymbëdhjetë personat e dërguar në spital janë në rrezik për jetën.

Një zyrtar policor tha se ka dëshmi që në këtë sulm kanë qenë disa sulmues, por asnjë person nuk është arrestuar nga policia deri në mëngjesin e së hënës.

Një dëshmitar tha se i ka dëgjuar rreth 60 apo 70 të shtëna, të gjithë njerëzit vraponin dhe veturat largoheshin nga vendi ku ndodhi sulmi.