Gjykata Themelore në Prishtinë, dega Podujevë, ka shpallur aktgjykim lirues ndaj të akuzuarit Mërgim Boshnjaku, për veprën penale “kanosja”.

Sipas aktgjykimit të shpallur të enjten, nga gjykatësi Gazmend Bahtiri, shpenzimet e procedurës bien në barrën e mjeteve buxhetore të gjykatës, raporton “Betimi për Drejtësi”.

Ndërsa e dëmtuara, për të realizuar kërkesën pasurore-juridike, është udhëzuar në kontest të rregullt juridiko-civil.

Ndryshe, Gjykata e Podujevës për këtë rast ka vendosur një herë me urdhër ndëshkimor, mirëpo vendimi ishte kundërshtuar nga i akuzuari, për çka ishte caktuar më pas shqyrtimi gjyqësor.

Sipas aktakuzës së 21 qershorit 2019, Mergim Boshnjaku akuzohet se me 3 qershor 2019, rreth orës 15:00, në rrugën “Zahir Pajaziti” në Podujevë, derisa vajza e axhës së tij, e dëmtuara Marigona Boshnjaku ishte në oborrin e shtëpisë së saj, i pandehuri me qëllim që t’i shkaktoj ndjenjën e frikësimit dhe të ankthit, kishte shkuar duke iu drejtuar me fjalët “kam me të kallëzuar ty”, me ç’rast tani të dëmtuarës i ka shkaktuar ndjenjën e ankthit dhe frikësimit se do t’i shkaktoj ndonjë të keqe.

Më këtë ai akuzohet se ka kryer veprën penale “kanosja” nga neni 181, paragrafi 1 të KPRK-së.