Të paktën pesë persona kanë vdekur nga një tërmet i fuqishëm që i goditi gjashtë rajone meksikane.

Shumë meksikanë ishin duke punuar nga shtëpia pasi kryeqyteti Mexico City është në karantinë për shkak të koronavirusit. Megjithatë, sistemi i alarmit funksionoi mirë, duke u dhënë kohë banorëve që të dilnin nga shtëpitë dhe banesat.

Tërmeti kishte fuqi prej 7.4 shkallësh të Rihterit dhe epiqendra e tij ishte në rajonin jugperëndimor, Oaxaca, ku u regjistruan të gjitha viktimat, shkruan “BBC”.

Kjo dridhje ndodhi më pak se tri vjet pas një tërmeti të fuqishëm që shkaktoi qindra të vdekur e la mijëra njerëz pa strehë në Mexico City.

Një zyrtar lokal në qytezën turistike, La Crucecita, tha se rreth 200 shtëpi janë dëmtuar. “Kemi humbur gjithçka për një moment para natyrës. Kjo është puna jonë e jetës”, tha Vicente Romero.

Pjesëtarët e ekipeve emergjente ende nuk kanë mundur të arrijnë në fshatrat e izoluara që besohet se janë goditur nga tërmeti, duke ngjallur frikë se numri i personave të lënduar është më i lartë.

Gjashtë orë pas tërmetit, në rajonin e prekur nga tërmeti u regjistruan më shumë se 400 dridhje tjera më të dobëta. Dridhja më e fuqishme ishte me 4.6 shkallë të Rihterit.