Presidenca ka konfirmuar anulimin e vizitës së presidentit Hashim Thaçi, në Washington pas ngritjes së aktakuzës, nga Gjykata Speciale, raporton Front Online.
“Presidenti i Republikës së Kosovës, Hashim Thaçi, pas njoftimit të bërë publik nga Zyra e Prokurorit të Specializuar lidhur me inicimin e ngritjes së aktakuzës, ka ndërprerë udhëtimin zyrtar drejt Shteteve të Bashkuara të Amerikës, ku ishte ftuar të merrte pjesë në kudër të procesit të dialogut ndërmjet Kosovës dhe Serbisë. Lidhur me anulimin e vizitës zyrtare në SHBA, Zyra e Presidentit të Republikës së Kosovës tashmë e ka informuar edhe Shtëpinë e Bardhë”, thuhet në njoftimin e Presidencës.
Lajmin për anulimin e vizitës së Presidentit në Washington e ka konfirmuar edhe përfaqësuesi i SHBA-ve për dialogun, Richard Grenell.
“Presidenti i Kosovës posa na njoftoi se e ka anuluar udhëtimin e tij për në Uashington, D.C pas njoftimit të bërë nga Zyra e Prokurorisë Speciale. Unë e respektoj vendimin e tij për mos pjesëmarrje në diskutime derisa çështjet ligjore të këtyre pretendimeve të zgjidhen”, ka shkruar Grenell në Twitter./Front Online
LAJMI I FUNDIT: Presidenti Hashim Thaçi anulon udhëtimin drejt Washingtonit
