Në këtë moment, Serbia ka njoftime nga të paktën tre vende që janë të gatshme të rishqyrtojnë vendimet e tyre për njohjen e pavarësisë së Kosovës.

Kështu shkruan gazeta serbe “Veçernje Novosti” në numrin e sotëm të saj.

Referuar burimeve jozyrtare, gazeta raporton se Beogradi do të drejtojë aktivitete diplomatike drejt atyre vendeve nëse Prishtina vazhdon të lobojë për njohje të reja dhe për pranim në organizatat ndërkombëtare, përcjell Radio Kontakt Plus.

Serbia ka qenë nën presion të madh nga Perëndimi për muaj të tërë për të ndaluar lobimin për tërheqjen e njohjes, shkruan “Veçernje Novosti”, duke theksuar se kërkesat e përsëritura të Prishtinës për pranim në organizatat ndërkombëtare “përfaqësonin një ndërprerje të drejtpërdrejtë të dialogut të rinovuar rishtas”.

Tani për tani, sipas ministrit të Jashtëm të Serbisë, Ivica Daçiq, Serbia do të përmbahet dhe të presë reagimin e bashkësisë ndërkombëtare për njoftimin e Hoti, por nëse nuk ndodh dhe nëse Prishtina aplikon për t’u anëtarësuar në organizatat ndërkombëtare, kryediplomati serb njofton vazhdimin e veprimeve për tërheqjen e njohjes, transmeton Klan Kosova.