Ministri i Drejtësisë, Selim Selimi, sot ka vizituar Qendrën për Mbrojtjen e Grave dhe Fëmijëve në Prishtinë, me ç ‘rast është takuar me drejtoreshën e QMGF-së, Zana Asllani si dhe udhëheqësen e UN Women, zyra në Kosovë, Vlora Tuzi- Nushi.

Ministri Selimi në vizitën e parë zyrtare është njoftuar për sfidat dhe mundësitë e bashkëpunimit me strehimoret e viktimave të dhunës në familje, thuhet në kumtesë.

“Kjo është vizita ime e parë zyrtare dhe jo rastësisht e kemi zgjedhur këtë strehimore për ta dërguar mesazhin se dhuna në familje duhet të trajtohet seriozisht. Dhuna në familje është një shqetësim i yni, të cilës do t’i qasemi në mënyrë serioze”, është shprehur Selimi.

Pas përfundimit të takimit, Ministri Selimi ka takuar edhe disa nga viktimat e dhunës në familje, që janë të strehuara në këtë qendër.

“Pata rastin gjithashtu të takohem me disa nga viktimat e dhunës që janë të strehuara këtu dhe mesazhi imi ishte: hapi i parë, më i madh dhe më i vështiri është ardhja e viktimave të dhunës në këtë qendër sepse kjo është një shkëputje e zinxhirit të dhunës”.

“Sfida më e madhe është ri integrimi i tyre. Besoj që shumë shpejtë në bazë të disa rekomandimeve që kemi bërë bashkë me Agjencitë e Kombeve të Bashkuara, të fillojmë menjëherë që të shikojmë mundësinë e bashkëpunimit me sektorin privat”.