Administrata amerikane e ushqimit dhe ilaçeve (FDA) aprovoi përdorimin e një testi për koronavirus nga Laboratorët Abbott, i cili nxjerr rezultatin në 15 minuta dhe kushton vetëm 5 dollarë, shkruan Forbes.

Abbott tha se planifikon të nxjerrë në përdorim testin në shtator, dhe deri në tetor do të rrisë prodhimin deri në 50 milionë teste. Testi quhet BinaxNOW COVID-19 Ag Card, dhe duhet të bëhet brenda shtatë ditëve që nga fillimi i simptomave. Mostra merret duke përdorur një shtupë. Përveç testit, Abbot krijoi edhe aplikacionin falas NAVICA për telefonat iPhone dhe Android, shkruan abcnews.al

Disa punonjës shëndetësorë dhe ligjvënës kanë deklaruar testi është efikas dhe se kostoja e prodhimit e ulët, do të lejojë testimin masiv, i cili do të ndihmojë  në zbulimin e rasteve të reja më shpejt dhe do të parandalojë përhapjen e koronavirusit.

Testet u kryen për shkak të rritjes së numrit të pacientëve me koronavirus, por gjithashtu edhe për shkak të  vonesës në rezultatet e testeve standarde.

Këto teste  do të lejojnë që njerëzit të testohen më shpejt dhe më shpesh, duke rritur mundësinë që dikush i infektuar me COVID-19 të jetë në gjendje të izolohet para se të infektojë të tjerët.