Kryeministri në detyrë, Albin Kurti me anë të një statusi në llogarinë e tij në Facebook ka folur për 24 majin, ditë kjo që shënon disa ngjarje historike.
Sipas tij, zgjedhjet e 24 majit të vitit 1992 janë një ngjarje me peshë që duhen trajtuar drejt, kurse pjesëmarrësit e saj meritojnë respektin dhe vlerësimin tonë.
Tutje, Kurti ka kujtuar edhe 24 majin e vitit 1992, datë kjo kur Dr. Ibrahim Rugova u zgjodh President i Kosovës për herë të pare.
Shkrimi i tij i plotë në Facebook:
28 vjet nga zgjedhjet e para
Zgjedhjet e 24 majit të vitit 1992 janë një ngjarje me peshë që duhen trajtuar drejt, kurse pjesëmarrësit e saj meritojnë respektin dhe vlerësimin tonë.
Zgjedhjet e para parlamentare, organizuar nga Alternativa e padhunshme demokratike e kohës, ishin një rast i mirë për pasurimin e arsenalit të metodave të organizimit dhe veprimit politik si dhe konsolidimin e pozitës politike së çështjes së Kosovës dhe viseve tjera shqiptare.
Këto zgjedhje po hapnin hullinë e asaj që në teorinë e veprimtarisë së padhunshme quhet strategjia e padhunshme konstruktive – metodat e ndërtimit dhe funksionalizmit institucional edhe në kushte të represionit e okupimit.
Organizmi vetanak i zgjedhjeve në kushte te robërisë dhe të shtypjes kishte pjesëmarrje impresive: 766.068 votues brenda vendit dhe 105.300 në mërgatë. Ato ishin sukses në vete dhe nuk mbetën pa jehonë mbarëkombëtare e ndërkombëtare.
24 maji 1992 është data kur Dr. Ibrahim Rugova u zgjodh President i Kosovës për herë të parë.
Qytetarët treguan guxim dhe vullnet anembanë Kosovës. Për fat të keq, asokohe nuk vazhdoi procesi i kompletimit dhe funksionalizimit të strukturës së pavarur institucionale të Republikës.
Megjithatë, 24 maji 1992 shënohet si datë kur populli kishte përzgjedhur rezistencën dhe po e konfirmonte pavarësinë. Ai injoronte zgjedhjet e Republikës së Serbisë dhe merrte pjesë masivisht në ato të Republikës së Kosovës, paçka se nën okupim.
https://www.facebook.com/albini2017/posts/878443562655529?__xts__[0]=68.ARB8LMjc8JWcOqwGeCoAiFqBa1_fj0508rsq2VqPZXbJbrtFVB8KGLnM3q9Vb-nF2ziTWkmvxzaIIrmzxlDIDXk7MeXja5ALILz9lsRjfhpzermWtIO-GajM4m_4Ea-1oQDcQPqFcChyM2t3h7yvj9dK1xz3N61eNme19JRz3jdkgI1ApUCJWUsyaB4Y6qZVpdl9SLMk4RQFQSO_dNwCn29om6Z6NDPnFUArcZJW_4S2fMt2_vDke5nmyIBo_ozTMm5GwgrciTdEhw6St8ZcuFn9K1_QBEmJs2Js9Z9lvoHZOgU_zn1EBBzMksmW4t9Cd7um6Fs9NclrEa6pbHA&__tn__=-R
