Partia Demokratike e Kosovës ka iniciuar ditë më parë plotësim-ndryshimin e Ligjit për Fondet Pensionale, i cili u mundëson qytetarëve të Kosovës tërheqjen e një pjese të kursimeve të tyre nga Trusti.

Lidhur më këtë deputeti i kësaj partie, Kujtim Gashi, në një prononcim për portalin Front Online, ka thënë se presin që ligji të procedohet sa më parë për shqyrtim.

Gashi tha se me projektligjin e propozuar nga PDK-ja, pas një periudhe 5 vjeçare pas përfundimit te pandemisë, mjetet e tërhequra nga Trusti do te fillojnë të rimbursohen.

“Ligji besoj do të procedohet shpejt, sipas procedurave administrative të Kuvendit. Natyrisht që kjo iniciativë e jona ka ardhur si përgjigje ndaj kërkesave të shumë kontributdhënësve të cilët duan të kenë çasie në mjetet e tyre të kursyera. Është një e drejtë e qytetarëve që në këtë kohë pandemie ata t’i tërheqin një pjese të mjeteve të tyre financiare. Sigurisht që do të ishte mirë që pas një analize të mirëfilltë nga Qeveria, pas një periudhe 5 vjeçare pas përfundimit te pandemisë, mjetet e tërhequra nga Trusti të fillojmë t’i rimbursohen kontributdhënësve të Trustit”, tha ai për Front Online.

Ndërsa projektligji i cili është inciuar nga Qeveria “Hoti”, për Rimëkëmbjen Ekonomike pas situatës së krijuar nga pandemia e Coronavirusit, ku pjesë e këtij projektligji është edhe tërheqja e 10 % të Trustit ka dështuar për herë të pestë në Kuvendit e Kosovës, pasi që nuk po arrin t’i merr votat për t’u miratuar./Front Online/