Ish-ministri i Shëndetësisë, Imet Rrahmani, po vlerëson se që nga paraqitja e parë e rasteve me Covid-19 në Kosovë, nga udhëheqësit e shëndetësisë është vërejtur një tendencë e mbivlerësimit të rolit të pjesës politike.

Ai në një intervistë për Front Online, kritikon eksponentët kryesorë për një “luftë”, siç tha ai, ndërmjet sukseseve dhe dështimeve.

Rrahmani për Front Online tha se pas 30 qershorit kanë ndryshuar rrethanat e menaxhimit të pandemisë së Coronavrirusit.

“Nga fillimi i paraqitjes rasteve të para pozitive është pa një tendencë e mbivlerësimit të rolit të pjesës politike në raport me rolin e pjesës profesionale, duke vrapuar për të paraqitur shifrat e ulëta si sukses të një qeverie dhe të lartat si dështim i tjetrës, gjithmonë duke shpërfillur faktin se edhe pandemia ka fazat e zhvillimit dhe të papriturat sepse bëhet fjalë për diçka shumë të panjohur jo vetëm për ne e para dhe e dyta, pas 30 qershorit rrethanat e menaxhimit të pandemisë kanë ndryshuar rrënjësisht”, deklaroi ai për Front Online.

Ish-ministri e vlerëson punën që është bërë nga Qeveria “Kurti”, por sipas tij, menaxhimi i pandemisë nënkupton edhe ruajtjen e ekonomisë dhe veprimtarive tjera shtetërore.

“Mbyllja e plotë ka mundur ta vogëloj numrin e rasteve, por menaxhimi i pandemisë nënkupton edhe ruajtjen e vitalitetit të ekonomisë dhe veprimtarive të tjera shoqërore dhe shtetërore”, tha Rrahmani.

Ai tha se pas lirimit të masave institucionet mbikëqyrëse harruan detyrat e tyre, dhe se qytetarët filluan të sillen sikur që rreziku ka kaluar.

“Mendoj se pas hapjes dhe lirimit të masave ka pasur një situatë ku pothuajse çdo kush ka besuar se rreziku kaloj dhe nevoja për kujdes ka ra, qytetarët filluan të sillen sikur s’ka asgjë derisa institucionet e mbikëqyrjes sikur harruan detyrat. Kjo edhe solli deri te rivendosja e kufizimeve në disa komuna të cilat po kundërshtohen nga autoritetet lokale, ndoshta me të drejtë”, tha Rrahmani për Front Online.

Ish-ministri i Shëndetësisë tha se Qeveritë që nga fillimi i pandemisë e deri më tani do të duhej që të bëjnë më shumë teste për Coronavirus.

“Pastaj ka pasur edhe në fillim të pandemisë, dhe ka vend edhe tash për testime më shumë, gjithashtu duhet të zbërthehet edhe më shumë nga institucionet shtetërore në teren, nevoja e racionalizimit dhe ruajtjes së personelit krahas ruajtjes së shërbimeve. Kjo në masë të madhe edhe po ndodh”, tha Rrahmani për Front Online.

Ndërsa për implementimin e  masave ekonomike emergjente të cilat i ka miratuar Qeveria e Kosovës, Rrahmani tha se për shkak të politizimit nuk është bërë me tempon e duhur.

Ai tha se fajtorë për këtë ngecje janë edhe pozita edhe opozita.

“Në rrafshin jo shëndetësorë kisha më thënë se si pasojë e politizimit të skajshëm të çdo gjejë në Kosovë, nuk është ecur me tempon e duhur në implementimin e masave ekonomike emergjente dhe ato për rivitalizimin e ekonomisë, gjithmonë me fajin e të gjithëve pa dallim, pozitë dhe opozitë, tha ai për Front Online.