Kosova do të ndërmarrë masa shtesë dhe rigoroze për ballafaqim me COVID-19 Kryeministri Avdullah Hoti ka bërë të ditur se Qeveria e Kosovës do të ndërmarrë masa shtesë dhe rigoroze për ballafaqim me pandeminë COVID-19, raporton portali Front Online.

Sipas tij, për respektim të këtyre masave s’do të ketë tolerancë për askend dhe njëkohësisht do të ndiqen procedurat për shpalljen e gjendjes së jashtëzakonshme.

Hoti po ashtu ka bërë të ditur se FSK-ja e ka marrë përsipër që të vejë në dispozicion shtretër, sipas nevojës.

“Siç e keni parë në bazë të shifrave, gjendja po rëndohet. Jemi gati në limitet e kapaciteteve shëndetësore. Shpreh keqardhje për të gjitha ato familje qe kanë humbur familjarët gjatë kësaj pandemie dhe atyre që janë prekur ju uroj shërim të shpejtë”, ka thënë ai.

Hoti ka folur edhe për masat shtesë që pritet të hyjnë në fuqi sot.

“Do të jenë më rigoroze, karshi atyre që kemi marrë më herët. Është e papranueshme që ndërkohë që vendimet janë në fuqi, të organizohen dasma e ahengje anembanë Kosovës. Masat tjera do të nënkuptojmë që të obligojmë të gjitha institucionet dhe bizneset për dezinfektues. Detyrohemi të ndalojmë komplet tubimet dhe ritet fetare. Shkojmë momentalisht me masa rigoroze të mbikëqyrjes dhe e lënë të hapur mundësinë për shpalljen e gjendjes së jashtëzakonshme”, ka thënë ai.