Sot në kryeqendrën amerikane, në Uashington në ditën e dytën të takimit në mes të palës kosovare dhe asaj serbe, pritet që të nënshkruhet një marrëveshje, e ku prezent do të jetë edhe presidenti amerikan Donald Trump, raporton Front Online.
Hulumtuesja e Institutit Demokratik të Kosovës (KDI), Violeta Haxholli, ka thënë për Front Online, që përfshirja e SHBA-ve në këtë fazë të dialogut, është një hap pozitiv për Kosovën.
“Si fillim, përfshirja aktive e SHBA-ve në këtë fazë të dialogut është pozitive për Kosovën duke qenë se SHBA-të janë partneri kryesor i Kosovës në shtet ndërtim dhe zhvillim, por edhe për procesin e dialogut në tërësi pasi përfshirja e SHBA-ve i ka dhënë një dinamikë të re këtij procesi”, ka deklaruar ajo.
Sipas saj ka pak gjasa që sot mund të ketë një marrëveshje finale në mes të Kosovës dhe Serbinë në kryeqendrën amerikane, raporton Front Online.
“Nuk mund të themi sigurt se a ka marrëveshje finale sot, por ajo që mund të themi me siguri është se në Uashington ka përpjekje të shtuar për të avancuar tutje me normalizimin e marrëdhënieve Kosovë-Serbi.
Haxholli ka konsideruar që marrëveshja e cila pritet që të nënshkruhet sot në Uashington në mes të Kosovës dhe Serbisë, është e një rëndësie të veçantë.
“Prandaj marrëveshja që pritet të nënshkruhet sot është e një rëndësie të veçantë dhe një hap i rëndësishëm në rrugën drejt normalizimit të marrëdhënieve mes Kosovës dhe Serbisë”, ka thënë ajo për Front Online. /Front Online.
