Kryetari i Aleancës për Ardhmërinë e Kosovës (AAK) Ramush Haradinaj është deklaruar rreth takimit të 4 shtatorit në Uashington, ku pala kosovare dhe ajo serbe, me ndërmjetësimin e amerikanëve, nënshkruan marrëveshjen për normalizim ekonomik.
Haradinaj është treguar kritik rreth komoditetit, siç është shprehur ai, të palës kosovare në Shtëpinë e Bardhë, duke thënë se kanë menduar se do të fitojnë më tepër.
“Logjika jonë ka qenë e komoditetit dhe kënaqësisë thuajse ne po marrim më shumë se sa na takon. Marrëveshja në Uashington është e njohur si materie e trajtuar më herët dhe është një hap përpara, pasi që po ndodh diçka në tavolinë ndërmjet Kosovës dhe Serbinë”, u shpreh ai në Debat Plus në TV Dukagjini.
Derisa ambasadori amerikan Richard Grenell ka hedhur poshtë se ekziston në dokumentin e marrëveshjes pika e dhjet për njohje reciproke, Haradinaj tha se ky nuk është versioni i parë e as i fundit i dokumentit të marrëveshjes, pasi që ai është punuar disa herë.
“Ne e kemi ditur se është e rrezikshme ndarja e Ujmanit. Kjo na ngjalli ta rritim vigjilencën në pikën rreth Ujmanit. Dokumenti është punuar disa herë. Versioni parë dhe i fundit është nisja dhe arritja. Aty ka ndryshuar gjuha, pasi nuk përmendet Republika, as e Kosovës dhe as e Serbisë. Unë nuk kam qenë optimist se do të mbetet pika dhjetë”, ka thënë Haradinaj.
