Ekonomisti Musa Limani në një intervistë për Front Online thotë se propozimet e Qeverisë dhe sindikatës për pagë minimale nuk janë më vend.

Sipas tij, një gjë e tillë duhet të përcaktohet përmes shportës jetësore.

“Tani kemi një propozim nga ana e Qeverisë se paga minimale duhet të jetë diku 264 euro, ndërkaq sindikatat kërkojnë të jenë 400 euro, unë mendoj se as njëri as tjetri nuk e kanë me vend, prandaj duhet të bazohemi në shportën jetësore”, tha ai për Front Online.

Ai thotë se duke u bazuar në ngritjen e çmimeve dhe problematikat që i solli pandemia, paga duhet të jetë 350 euro.

“Unë si ekonomist, duke u bazuar në nivelin të zhvillimit ekonomik të Kosovës në situatën problematike të pandemisë dhe ngritjes së çmimeve të tjera, mendoj që paga 350 euro do të jetë optimale në këtë rast”, tha Limani për Front Online.

Sipas ekspertit të ekonomisë, situata e cila është krijuar aktualisht për 60% të popullatës së Kosovës është e papërballueshme.

Limani thotë se Qeveria duhet të veprojë në mënyrë urgjente dhe të mbështesë konsumatorët.

“Duke marrë parasysh nivelin e pagave të ulëta, shumë të ulëta të pensionistëve  dhe skemën sociale mund të konstatoj se situata e cila është krijuar përmes pandemisë  edhe nivelit të lartë të çmimeve është e papërballueshme diku mbi 60% të popullatës së Kosovës, prandaj Qeveria duhet të veprojë në mënyrë shumë urgjente të mbështesë konsumatorët të cilët gjenden në një situatë të rëndë”, u shpreh ekonomisti Musa Limani.

Ndryshe, vlera e pagës minimale në Kosovë nuk ka ndryshuar qysh nga viti 2011, ajo është 170, përkatësisht 130 euro./FrontOnline/

Lexo edhe:

Propozimi prej 264 € për pagën minimale, askush nuk pajtohet me Qeverinë