Liderët e Kosovës dhe të Serbisë do të takohen me 2 shtator në Uashington.Ky takim ka qenë i paraparë të mbahej me 27 qershor, por u anulua pas ngritjes së aktakuzës ndaj presidentit Hashim Thaçi nga Gjykata Speciale.

Në një postim në profilin e tij zyrtar në ‘Facebook‘, kryeministri i vendit Avdullah Hoti ka bërë të ditur se ndër të tjera do të diskutohet për projekte ekonomike.

Por si e komenton Lëvizja Vetëvendosje këtë takim?

Në një prononcim për GazetaBlic deputeti i kësaj partie Mefail Bajqinovci e quan jo legjitime dhe pa kredibilitet këtë qeveri.Ai ka theksuar se prioritet duhet të jetë Covid-19.

‘Prioritete të Kosovës duhet të jenë luftimi i pandemisë COVID-19, pra, dalja nga kriza shëndetësore; luftimi i krimit të organizuar e korrupsionit të lartë, pra drejtësia shtetërore; dhe, zhvillimi ekonomik e shoqëror, pra punësimi, sidomos i rinisë dhe grave. Qeveria aktuale e Kosovës po dështon në secilin rrafsh. Sa i përket Serbisë, ne mund të dialogojmë si shtete fqinje, bazuar në parimin e reciprocitetit, dhe pas përgatitjeve të duhura e me transparencë të plotë‘, ka thënë Bajqinovci