Lidhja Demokratike e Kosovës po vazhdon negociatat për arritjen e marrëveshjeve për bashkëqeverisje me subjektet politike për formimin e Qeverisë së re. Deri më tani kjo parti ka arritur të finalizojë marrëveshje për koalicion me partinë e Ramush Haradinajt, AAK-në, me Nisma-n e Fatmir Limajt si dhe me Listën Serbe, shkruan “Front Online”.

Kreu i LDK-së, gjatë ditës së sotme deklaroi se AKR-ja e Behgjet Pacollit do ta ketë vendin e vet në koalicion.

Në një prononcim për “Front Online”, deputetja e AKR-së, Mirlinda Sopi tha se ende nuk është vendosur asgjë se a do t’i bashkohet edhe kjo parti në qeverisje, LDK-së.

Ajo tha se janë në pritje të ardhjes së Pacollit në Kosovë, e më pas do të merret një vendim i përbashkët partisë.

“Në momentin që kryetari Pacolli vjen në Kosovë ne do të takohemi dhe do të marrim një vendim të përbashkët si AKR”, tha shkurt Sopi për Front Online.

Kandidati i LDK-së i propozuar për kryeministër në Qeverinë e re, Avdullah Hoti, është duke i prirë ekipit negoicues me partitë politike në vend për formimin e institucioneve të reja. /FrontOnline/