Do të duhej të ishte në atdhe. E për me tepër prapa grilave.

Por, deputeti i komunitetit ashakali, Etem Arifi nuk ndodhet në asnjërën. As në qeli e as në shtëpi.

Ai për t`i ikur vuajtjes së dënimit me burgim prej 1 viti e 3 muaj për veprën penale mashtrim me subvencione, siç merr vesh Front Online nga burime të sigurta,  ia dyshohet se i ka mbathur në Maqedoninë e Veriut.

Dyshohet se ka arritur të arratiset në shtetin fqinj, ndonëse ndaj tij që gati 7 muaj Gjykata Themelore në Prishtinë ka lëshuar një fletarrest.

“Lidhur me kërkesën tuaj ju njoftojmë se deri më tani Gjykata Themelore në Prishtinë nuk ka pranuar njoftim zyrtar nga Policia e Kosovës se i dënuari E.A është arrestuar”.

Mos prezencën në burg të deputetit, që përvetësoi për vete rreth 26 mijë euro, e konfirmuan edhe nga Shërbimi Korrektues i Kosovës.

“Lidhur me personin në fjalë, ju njoftojmë se deri më tani  i njëjti nuk është paraqitur në ndonjërin nga institucionet korrektuese”.

Dyshimet se ai nuk ndodhet në Kosovë shtohen akoma më shumë nga kjo tentim-thirrje, nga e cila, kuptohet se  protagonisti telefonin e kishte krejtësisht jashtë linjës.

E në polici nuk u doli dita për të kthyer përgjigjie.

Përgjigjia mungon edhe për një çështje tjetër.

Ende nuk dihet nëse vlen vota që deputeti, edhe pse i dënuar, e hodhi pro formimit të Qeverisë Hoti.

Kushtetuta e specifikon qartë se deputeti e humb mandatin e tij në momentin kur me një vendim gjyqësor të formës së prerë dënohet me një ose më shumë vjet burgim.

Për këtë çështje, Vetëvendosje ka kërkuar interpretim nga Gjykatës Kushtetuesja, por një përgjigje përfundimtare, akoma mungon.

E ajo që dihet është  se politikanët kosovarë nuk e kanë sefte ikjen nga drejtësia.

Xhabir Zharku e kishte lëshuar vendin kur në vitin 2011 Eulexi e pati dënuar me 3 vjet burg, duke e shpallur fajtor për veprat penale, “detyrim” dhe “armëmbajtje pa leje”.

Ai u rikthye në atdhe nga Suedia, aty ku jetoi për gati pesë vjet e gjysmë, vetëm pasi  kaloi afati i ekzekutimit të dënimit ndaj tij.

/Front Online/