Ligjvënësi australian Shaoquett Moselmane pritet të suspendohet nga partia e tij pas raporteve se zyra e tij po hetohet nga agjenci të sigurisë kombëtare për lidhje me Kinën.
Autoritetet asutraliane kanë bastisur zyrën dhe banesën e Shaoquett Moselmane, një politikan nga New South Wales sot. Policia dhe agjencitë e inteligjencës së Australisë kanë njoftuar se ka një “hetim të vazhdueshëm” por nuk dhanë detaje tjera.
Moselmane, që është i anëtar i partisë opozitare të Laburistëve nuk ka komentuar ende rreth kësaj çështje.
Kryetarja e partisë laburiste Jodi McKay tha se raportet e mediave për lidhjet e tij me Kinën ishin tmerrësisht shqetësuese. Ajo shtoi se hetimi duhet të kryhet dhe se ai nuk do të ulet më në grupin e tyre parlamentar.
Kryeministri i Australisë, Scott Morrison, tha se ai nuk mund të flasë për detaje të hetimit por e bëri me dije ka “vazhduar për një kohë të gjatë”. Ai shtoi se “Qeveria është e vendosur që të mos lejoj askënd të ndërhyjë në veprimtarinë e Australisë. Ne do ti rezistojmë atyre dhe do të veprojmë siç dëshmohet me veprën e sotme” tha kryeministri Morrison.
Marrëdhëniet mes Australisë dhe Kinës janë tensionuar edhe më pas shpërthimit të pandemisë së Covid-19 dhe kërkesës së shtetit australian për hetim ndërkombëtar rreth origjinës së koronavirusit. Kina është hakmarrë ndaj tyre duke vendosur sanksione ndaj produkteve australiane javëve të fundit.
Vitin e kaluar ishte raportuar për tentime të spiunazhit dhe aktivitete të agjencive kineze në Austrlia në media por kjo ka eskaluar tani pasi javën e kaluar u raportua për sabotim në shkallë të gjerë me sulme kibernetike ndaj institucioneve australiane që i dyshuari kryesor nënkuptohej por u refuzua të emërohej nga kryeministri Morrison.
Në vitin 2017 një senator australian ishte detyruar të jepte dorëheqje pas dyshimeve rreth marrëdhënieve të tij me një biznesmen kinez. Pas këtij skandali Australia miratoi reforma gjithëpërfshirëse të sigurisë kombëtare për të parandaluar këto ndërhyrje.
