Bota/Rajoni

Aty coronavirusi ‘bëri kërdinë’, por ky qytet brazilian mund të ketë arritur ‘imunitetin e tufës’!

Aty coronavirusi ‘bëri kërdinë’, por ky qytet brazilian mund të ketë arritur ‘imunitetin e tufës’!
16:55 | 25 Shtator 2020

Qyteti brazilian i Manaus, i cili u shkatërrua nga pandemia e Coronavirusit, mund të ketë pasur aq shumë të infektuar sa që popullsia e tij tani përfiton nga “imuniteti i tufës”, sipas një studimi preliminar.

Sipas mediave të huaja, përcjell Telegrafi, botuar në faqen e internetit medRxiv, studimi analizoi të dhënat e infeksionit me modelimin matematikor për të vlerësuar se 66 për qind e popullsisë kishin antitrupa ndaj coronavirusit të ri në Manaus, ku përhapja e pandemisë ishte aq e shpejtë sa edhe brutale.

Kjo mund të ketë qenë e mjaftueshme për të arritur pragun e imunitetit të tufës, në të cilën mjaft anëtarë të një popullate janë imune ndaj një sëmundjeje që nuk mund të përhapet më në mënyrë efektive, thanë autorët e studimit, një grup prej 34 studiuesve brazilianë dhe ndërkombëtarë.

“Shkalla jashtëzakonisht e lartë e infeksionit sugjeron që imuniteti i tufës luajti një rol të rëndësishëm në përcaktimin e madhësisë së epidemisë”, shkruajnë ata në studim, i cili ende nuk i është nënshtruar rishikimit të kolegëve.

“Të gjitha shenjat tregojnë se ishte fakti i të qenit kaq i ekspozuar ndaj virusit që solli zvogëlimin e numrit të rasteve të reja dhe vdekjeve në Manaus”, ka thënë koordinatori i studimit, profesori i mjekësisë në Universitetin e Sao Paulos, Ester Sabino.

I ndodhur në pyjet e Amazonës, Manaus ishte skena e imazheve të tmerrshme të spitaleve, varreve masive dhe kufomave të grumbulluara në kamionë frigoriferë kur pandemia ishte në kulmin e saj atje në maj.

Por vdekjet në qytetin me 2.2 milion njerëz kanë rënë në mënyrë dramatike javët e fundit, në një mesatare prej vetëm 3.6 në ditë gjatë 14 ditëve të fundit.

Manaus tani është një nga qytetet që po hapet më shpejt nga bllokimi në Brazil, vendi me numrin e dytë më të lartë të vdekjeve në të gjithë botën, pas Shteteve të Bashkuara, me gati 139,000 njerëz të vdekur.

Kjo përfshin hapjen e shkollave, bizneseve, jetës së natës dhe teatrit të saj të famshëm të operas.

Sidoqoftë, ekspertët e shëndetit paralajmëruan se përpjekja për të arritur imunitetin e tufave ishte një rrugë e rrezikshme për politikëbërësit ndërsa ekspertë të tjerë paralajmëruan që imuniteti ndaj virusit mund të jetë jetëshkurtër.

Manaus ka regjistruar 2,462 vdekje nga COVID-19 dhe nëse do të ishte shtet, do të kishte shkallën e dytë më të lartë të vdekshmërisë në botë, me 100.7 vdekje për 100,000 popullsi.

1 abonim, 3 paisje, 240 kanale shqip – NimiTV në gjithë Evropën për vetëm 99.90€ për 12 muaj

Të tjera