Administrata Tatimore e Kosovës përmes një komunikatë për media ka sqaruar se sa i përket çështjes së monitorimit të çmimeve për test të COVID19 nga ana e laboratorëve të licencuar nga Ministria e Shëndetësisë, ky institucion nuk ka asnjë obligim ligjor.

Ministri i Shëndetësisë Armend Zemaj përgjegjësinë për kontrollimin e çmimeve për testimet në laboratorët privat të licencuar nga ky dikaster e ka hedhur te Administrata Tatimore e Kosovës dhe Agjencia Kosovare e Konkurrencës.

Në reagimin e saj ATK ka thënë se i vetmi organ për monitorimin e këtyre çmimeve është Autoriteti Kosovar i Konkurrencës.

Reagimi i plotë:

Lidhur me deklarimet e djeshme në media për çështjen e monitorimit të ngritjes së çmimeve për test të COVID19 nga ana e laboratorëve të licencuar nga Ministria e Shëndetësisë, Administrata Tatimore e Kosovës sqaron se asnjë dispozitë ligjore nuk e obligon dhe nuk i jep të drejtë ATK-së, për të monitoruar procesin e rregullimit të çmimeve të shitjes.ATK bën me dije se i vetmi organ, i cili ka bazë ligjore për të monitoruar aplikimin e çmimeve monopoliste, si dhe të zbatimit të konkurrencës së drejt në treg është Autoriteti Kosovar i Konkurrencës.