Takimi i përfaqësuesve të Prishtinës dhe Beogradit në Shtëpinë e Bardhë nuk u anulua, por u shty, tha ambasadori amerikan në Serbi, Anthony Godfrey.

Në një intervistë për Politika, Godfrey tha se Shtetet e Bashkuara janë të zhgënjyer që takimi nuk u zhvillua, sepse ata kishin pritshmëri të mëdha se do të bëhej përparim i vërtetë, i cili më vonë do të jepte impuls për ngjarjet e ardhshme, transmeton Reporteri.

Duke folur për rolin e të dërguarit të posaçëm të Presidentit amerikan, Richard Grenell, Godfrey tha se përshtypja e tij është se pa energjinë dhe punën e palodhshme të Grenell, ne do të vazhdonim të merreshim me çështjen e doganave dhe masave të tjera reciproke, si pengesa për rifillimin e dialogut.

Ambasadori amerikan në Beograd theksoi se përfshirja e Përfaqësuesit Special të BE-së për Dialog, Miroslav Lajcak do të çojë në vazhdimin e dialogut, duke vlerësuar se partnerët evropianë tani janë shumë aktivë, sepse po përpiqen të mbajnë ritmin me Grenell.