Ekipet e kërkim-shpëtimit i kanë vazhduar kërkimet me qen nëpër rajonet e shkatërruara nga zjarret në tri shtete perëndimore të Shteteve të Bashkuara për t’i gjetur trupat e personave të zhdukur.
Flakët kanë shkatërruar mijëra shtëpi dhe gjashtë qyteza në valën e fundit të përhapjes së zjarreve. Që nga fillimi i gushtit, së paku 26 persona kanë vdekur, shkruan Reuters, transmeton Gazeta Express.
Megjithatë, pas katër ditëve të motit të nxehtë e me erë, fundjava solli erë më të butë nga Oqeani Paqësor dhe mot më të freskët e me më shumë lagështi. Këto kushte bënë të mundur që ekipet e kërkim-shpëtimit të depërtonin në zonat ku zjarret më herët po përhapeshin në mënyrë të pakontrolluar.
Së paku gjashtë persona kanë vdekur këtë javë në Oregon, sipas faqes zyrtare për përcjelljen e përhapjes së zjarreve. Guvernatorja Kate Broën ka thënë se dhjetëra njerëz të tjerë mbesin të zhdukur në tri shtete.
Në Kaliforni, dhjetëra mijëra zjarrfikës ishin duke luftuar me 28 zjarre në natyrë deri të shtunën pasdite, sipas Departamentit për Pylltari dhe Mbrojtje nga Zjarri. Përmirësimi i kushteve klimatike ua mundësoi zjarrfikësve vënien nën kontroll të shumicës së vatrave të zjarrit.
Një zyrtar i Shtëpisë së Bardhë tha se presidenti Trump do të takohet të hënën me zyrtarët e Kalifornisë. Kreu i Shtëpisë së Bardhë ka thënë se guvernatorët e shteteve perëndimore e kanë një pjesë të fajit për zjarret e shumta viteve të fundit, duke i akuzuar ata për menaxhim të dobët të pyjeve.
