23 milionë euro është vlera e shumës që Komuna e Prishtinës ka paraqitur si detyrime kontingjente për pjesën e parë të këtij viti. Këto detyrime janë pretendime të bizneseve dhe individëve, të cilët kanë paditur Komunën me arsyetimin se janë dëmtuar në çështje të ndryshme, si pronësore, administrative, kompensim dëmi për shkëputje të kontratave dhe të tjera. Ato mund të kthehen në borxhe detyruese nëse për këtë vendos gjykata, raporton KOHA.
Në raportin financiar të Komunës për tremujorin e dytë janë paraqitur vlerat e këtyre detyrimeve për periudhën janar-qershor 2020, ku shumica kanë të bëjnë me kompensim dëmi. Vlera më e lartë e pretenduar është një milion e 298 mijë euro, derisa më e ulëta 9 mijë euro. Mirëpo, për vlerën këtyre detyrimeve, sipas Iniciativës për Progres (INPO), që monitoron punën e Komunës, nuk është ndëshkuar asnjë zyrtar.
Qëndrim Arifi nga kjo organizatë thotë se praktika e këtillë mosndëshkuese duhet të ndryshojë.
Për Arifin shqetësuese është edhe mungesa e informacioneve që tregojnë se sa prej këtyre detyrimeve Komuna realizon pagesa. LDK-ja, që është parti opozitare në Prishtinë, e vlerëson shqetësuese rritjen e padive ndaj Komunës gjatë udhëheqjes së kryetarit Shpend Ahmeti.
Zyra për informim e Komunës nuk ka kthyer përgjigje për këtë çështje. Nuk janë deklaruar as kryetari Ahmeti e as këshilltarët komunalë të partisë së tij, PSD.
Ndër vite, Auditori i Përgjithshëm ka vlerësuar se niveli i lartë i detyrimeve kontingjente mund të përkeqësojë gjendjen financiare të Komunës nëse vendimet përfundimtare të gjykatës do të jenë në favor të palëve paditëse.
