Një grup i përfaqësuesve të aktorëve të Prishtinës, kanë mbajtur një konferencë për media para Komunës së Prishtinës, ku kanë kërkuar themelimin e trupës rezidente në Teatrin Dodona. Ata paralajmëruan edhe protesta nëse nuk merren parasysh kërkesat e tyre.
Leonit Maloku përfaqësues i këtij grupi theksoi se iniciativa për themelimin e trupës rezidente është marrë qysh para 2 viteve por që ende nuk është realizuar.
Ai tha se i është shtruar kërkesë edhe Ministrisë së Financave që të shtohet numri i aktorëve në Teatrin Dodona, por kërkesa e tyre ka hasur në vesh të shurdhër.
Si artistë të pa punë ata kanë kërkuar përkrahje edhe nga kryetari i Komunës, Shpend Ahmeti për iniciativën e tyre, por që Maloku thotë se edhe nga ana e kryetarit është neglizhuar.
“Teatri Dodona funksionon me vetëm pesë aktorë qe 15 vjet, prodhon vetëm shfaqje për fëmijë dhe nuk prodhon shfaqje profesionale për të rritur. Andaj kërkesa jonë është bazuar mbi ligjin për teatro pika nr. 7 neni nr. 5 ku specifikisht thotë ‘Teatri i qytetit mundë të ketë ansambël rezident prej më së paku dhjetë dhe më së shumti njëzet aktorë’. Pra teatri i qytetit Dodona pothuajse qe 20 vjet funksionon me vetëm pesë aktorë, andaj ne nuk po kërkojmë asgjë tjetër vetëm respektimin e ligjit dhe hapjen e konkursit për pesëmbëdhjete aktorët e rijnë”, tha Maloku.
Nëse kërkesat nuk realizohen, Maloku tha se do të organizojnë protesta para Komunës me tenda, ku aty do të bëjnë gjumin, do të bëjnë monologë poezi e të gjitha gjërat që ju takojnë aktorëve.
Edhe Ilir Prapashtica thotë se si aktorë po kërkojnë të drejtat e tyre.
“Me pas një vend të punës është e drejtë elementare edhe me protestua, tek e fundit që thamë edhe me bo interpretime të ndryshme në mënyre pozitive gjithmonë , për me mujtë me arrite qëllimin tonë. Tu e pasë parasysh që të gjitha komunat e kanë formuar trupën rezidente të teatrit vetëm Prishtina ka ngel arsyeja ku është nuk e dimë janë disa thashetheme nga komunat, ministria e kështu me radhë por neve këto si aktorë nuk na interesojnë”, deklaroi Llapashtica.
Kërkesat e tyre janë që të hapen konkurse dhe audiocione për teatrin Dodona dhe të fillojë me shfaqje për të rritur, gjithashtu ti hapen dyert për negociata nga kryetari i komunës dhe ministria e financave.
