Dialogu, që zyrtarisht supozohet të ndërmjetësohet nga Bashkimi Evropian, tashmë ka hyrë në rendin e ditës së Administratës Trump. Ambasadori Grenell dha lajmin se ka caktuar takim mes Kosovës e Serbisë në Shtëpi të Bardhë.

Gazeta Express ka pyetur zyrën për Politikë të Jashtme të BE’së, nëse Grenelli dhe SHBA’ja i ka anashkaluar tërësisht, duke marrë vetë në dorë problemin më të madh të Ballkanit.

Kur përfaqësuesi special i Bashkimit Evropian, Miroslav Lajcak raportohej se ka mbetur i bllokuar në Aeroportin e Cyrihut rrugës për në Prishtinë, Ambasadori Grenell në Tëitter tashmë kishte rikthyer dialogun mes Presidentëve Hashim Thaci e Aleksandër Vuciq, me ekipet e tyre.

Emisari i Trumpit për dialogun Kosovë – Serbi, Richard Grenell, ka treguar se është caktuar një takim mes palëve të Ballkanit, në Shtëpinë e Bardhë.

Grenell, që për momentin ka për detyrë vetëm ndërmjetësimin mes Kosovës e Serbisë, dje ripostoi në profilin e tij komente të të tjerëve, të cilat thonin se për shkak të paaftësisë së Evropës, Amerika po e merr në dorë cështjen e Kosovës dhe Serbisë.

A është eklipsuar BE’ja tërësisht nga SHBA’ja për problemin në rajonin, që gjeografikisht i takon Evropës?

Në një përgjigje, Zyra e Borellit e ka komentuar takimin e thirrur në Uashington, më datën 27 të këtij muaji.

Zyra e Përfaqësuesit të Lartë të BE’së thotë se mirëpresin iniciativat të cilat, sipas tyre, përkrahin dialogun që ndërmjetësohet nga BE’ja.

Duke theksuar disa herë se ndërmjetësuesi në cështjen Kosovë – Serbi është Evropan, kjo zyrë thotë se sot në Prishtinë, përfaqësuesi special, Miroslav Lajcak po vjen me data konkrete kur do rinis dialogu.

“Ne i mirëpresim të gjitha iniciativat në përkrahje të dialogut të ndërmjetësuar nga Bashkimi Europian. Përfaqësuesi special i Bashkimit Evropian, Miroslav Lajcak, pritet të jetë në Prishtinë këtë pasdite për të diskutuar modalitetet e ndialogut të ndërmjetësuar nga BE’ja. Përfaqësuesi Special i BE’së ka për qëllim të prezantojë datat konkrete për riktim të shpejtë”, thuhet në përgjigjen e BE’së.

Megjithatë, SHBA’ja tashmë ka caktuar datën e rikthimit në tavolinë të liderëve kosovarë dhe atyre serbe.

Grenell ka lajmëruar dje se ka marrë zotimin nga Qeveria e Kosovës dhe e Serbisë që, njëra palë të ndalë përpjekjet për anëtarësim në organizata ndërkombëtare, e tjetra të ndalë fushatën kundër njohjes së shtetesisë së Kosovë, deri më 27 qershor kur do të takohen në Uashington.

“Sapo pranova angazhimin e qeverive të Kosovës dhe Serbisë për të pezulluar përkohësisht fushatën e çnjohjeve dhe anëtarësimet në mekanizmat ndërkombëtarë, me qëllim që të takohemi në Uashington DC, në Shtëpinë e Bardhë më 27 qershor, për të biseduar për dialogun. Nëse njëra palë nuk është e kënaqur me bisedimet e 27 qershorit, ato mund të kthehen sërish në status quo, pasi të largohen nga Uashingtoni. Siç kemi thënë vazhdimisht, ne së pari duhet të bëjnë përparim në rritjen e ekonomive. Ky është fokusi“, ka shkruar emisari i Trumpit.

Ndërkaq, BE’ja konsideron se dialogu që ajo e ka ndërmjetësuar deri tash ka qenë i frytshëm dhe ka pasur rezultate konkrete për qytetarët në Kosovë dhe Serbi.

“Dialogu i ndërmjetësuar nga BE’ja ka qenë një proces, që ka sjellë rezultate konkrete për popullin e Kosovës dhe të Serbisë, që nga nisja e tij”, thuhet në përgjigjen e BE’së