Lufta kundër pandemisë COVID-19 po merr një drejtim të ri, pas tërheqjes progresive të masave shtrënguese, kryesisht të atyre lidhur me lëvizjen dhe qarkullimin e lirë të qytetarëve në rajonet e ndryshme të Italisë.
Me këto fjalë Ambasada e Kosovës në Itali ka paralajmëruar se nga data 3 qershor 2020 do të fillojë punën, por në mënyrë graduale, duke respektuar normat që parashihen me ligj.
“Ambasada e Kosovës në Romë ka marrë masat e nevojshme teknike për rihapjen progresive për publikun, në përputhje të plotë me të gjitha normat ligjore, që parashikohen në udhëzimet e institucioneve përgjegjëse. Duke marrë parasysh këto zhvillime, ju informojmë se ecuria e punës me palët në ARKS – Romë do të rifillojë të mërkurën, më datën 3 qershor 2020”, thuhet në njoftim.
Ambasada thekson se hyrja në ambientet e tyre do të mundësohet vetëm për personat të cilët paraprakisht kanë marrë termin/takimin nëpërmjet kontakteve.
Për të marrë shërbime brenda Ambasadës “duhet të jeni të pajisur me laps/kimik, maskë, doreza dhe sigurisht të respektohet distanca fizike”.
