Kryetari i Bashkisë së Sarandës, Ardian Gurma ka thënë se këtë vit synojnë turistët shqiptarë nga Kosova dhe Maqedonia e Veriut.
Gurma në një intervistë në RTV Dukagjini thotë se qeveria shqiptare tashmë ka formuluar një draft se si duhet të organizohet turizmi për këtë vit në këtë kohë pandemie.
Ai thotë se për këtë vit një pjesë e plazhit do të jetë pa pagesë për të gjithë turistët që e vizitojnë Sarandën.
“Jam takuar edhe me operatorët turistik të cilët kanë premtuar se këtë vit do të ketë çmime më të lira për pushuesit përmes një pakete special. Në krahasim me vitet tjera, çmimet e akomodimit dhe fjetjes do të jenë 20% më lirë se vitet tjera”.
“Është një vendim që është marrë nga Shoqata e Operatorëve Turistik në bashkëpunim me bizneset kryesisht hoteliere. Këtë vendim ata ma kanë transmetuar edhe mua”.
Kryetari i Bashkisë së Sarandës thotë se kanë kërkuar nga Ministra e Turizmit që të shtohen plazhet që do të mund të frekuentohen nga vizitorët.
