Situata e krijuar në vend pas rrëzimit të Qeverisë Kurti, në lidhje me atë se kujt duhet t’i takojë mandatari për formimin e Qeverisë, ka ngjallur akuza e kundërakuza ndërmjet partive politike në vend.
Partitë opozitare në vend së bashku me Lidhjen Demokratike të Kosovës janë të pajtimit që qeveria e re do të duhej të formohej në Kuvend derisa Lëvizja Vetëvendosje është e vendosur që qeveria e re do duhej të krijohej me vullnetin qytetar, pra me mbajtjen e zgjedhjeve të reja pas kalimit të pandemisë COVID-19, raporton Front Online.
Madje ka qenë presidenti i vendit, Hashim Thaçi, ai i cili duke u thirrur në mandatin kushtetues që ka, përmes shkëmbimit të letrave me kryeministrin në detyrë Albin Kurti, i ka bërë thirrje që të dërgojë një emër për mandatar të Qeverisë, veprim të cilin lideri i VV-së e ka konsideruar të ngutshëm duke thënë se presidenti Thaçi nuk është neutral, por që ka qëllime politike dhe personale.
Në ndërkohë në rast se presidenti fton në takim partinë e dytë më të votuar në zgjedhjet e 6 tetorit, në këtë rast LDK-në për të folur rreth mundësisë për t`i dhënë mandatarin, njohësit e Kushtetutës vlerësojnë që presidenti me këtë veprim do ta shkelte aktin juridik më të lartë të shtetit.
Riza Smaka, njohës i Kushtetutës ka thënë për Front Online, se presidenti nuk ka autorizim kushtetues për ta bërë një veprim të tillë.
“Presidenti i Republikës së Kosovës Hashim Thaçi nuk duhet të bëj këso veprimesh sepse nuk ka autorizim të tillë nga kontradiktat e nenit 95 paragrafi 5, ose nenit 82 e të tjerë, sepse vetëm përfaqësuesi politik i autorizuar nga subjekti politik më i madh në Kuvend pra Lëvizjes Vetëvendosje është i autorizuar për ta propozuar kandidatin për mandatar”, ka thënë ai për portalin.
Për sa i përket një takimi të mundshëm në mes të Thaçit dhe liderit të LDK-së Isa Mustafa për këtë çështje, Smaka ka theksuar që kjo paraqet një nguti që nuk justifikohet me asgjë.
“Zotëri Isa Mustafa është i etur për pushtet dhe do të bënte çmos për tu bërë pra dështak fund e krye për poste tjera. Në këtë rast flasim në kontekstin e Kushtetutës . Prandaj nuk do të justifikohej me asgjë kjo nguti”, ka thënë tutje ai.
Ndërsa lidhur me funksionimin e qeverisë në detyrë, njohësi i Kushtetutës ka thënë që ka të gjitha autorizimet e ekzekutivit, pasi që sipas tij asnjë akt juridik nuk i`a mohon këto autorizime.
“Qeveria ekziston dhe quhet në dorëheqje sipas nenit 100 paragrafi 2, ani se kjo qeveri nuk ka dhënë dorëheqje, mirëpo i ka të gjitha autorizimet e ekzekutivit sepse në asnjë akt juridik nuk e ka të kufizuar këto autorizime. Andaj çdo gjë është për të mirën e përgjithshme edhe është mirë që kjo çështje të zgjidhet në mënyrë elegante dhe qytetare”, ka thënë Smaka. /Front Online/
