Drejtoria për Zhvillim Ekonomik në Komunën e Gjilanit e ka publikuar raportin rreth ndikimit që ka pasur pandemia COVID-19 në ekonominë lokale të Gjilanit.
Në këtë hulumtim janë anketuar 304 biznese. Sipas gjetjeve të raportit, 788 punëtorë kanë humbur vendet e tyre të punës brenda dy muajve (mars-maj).
Në raport theksohet se shumica e bizneseve kanë deklaruar humbje të konsiderueshme në aktivitetin e tyre ku prin prodhimi, tregtia, shërbimet, hoteleria duke u pasur nga ato ndërtimore, bujqësore dhe transportuese.
Bizneset kanë raportuar për rënie të nivelit të shitjes gjatë pandemisë, zvogëlim të kërkesave nga klientët si dhe shkëputje të kontratave.
“Hulumtimi me bizneset e anketuara tregon se në masë të madhe është reduktuar numri i punëtorëve prej 3 mijë e 409 sa ishin para pandemisë në 2 mijë e 621 gjatë pandemisë duke ndikuar në humbjen e 788 vendeve të punës. Kryesisht bizneset e mëdha dhe të mesme kanë zvogëluar në masë të madhe numrin e punëtorëve gjatë pandemisë dhe pothuaj e njëjta situatë është deklaruar edhe nga bizneset e vogla”, shkruhet në këtë raport.
Gjysma e bizneseve të anketuara kanë deklaruar se nuk mund të përballojnë këtë situate, e cila ka goditur ekonominë.
”Një përqindje e madhe, apo 54 përqind e bizneseve deklarojnë se nuk mund të përballojnë situatën me pandeminë dhe periudha maksimale që biznesi mund të operojë me rezultat pozitiv ose pa humbje është 0 deri 3 muaj. 30 perqind e bizneseve kanë deklaruar se mund të mbijetojnë deri në 6 muaj ndërsa 8 përqind e bizneseve mund të operojnë prej 3 deri 6 muaj dhe 9-12 muaj”, shkruhet në këtë raport.
Raporti nënvizon se 50 përqind e bizneseve të anketuara kanë deklaruar se nuk planifikojnë largimin e punëtorëve nga puna. Kurse 26 përqind e bizneseve kanë deklaruar se ka gjasë që të largojnë punëtorë nga puna brenda dy muajve. Kurse 24 përqind e bizneseve kanë deklaruar se ka gjasë që të largojnë ndonjë punëtor brenda 1 muaji.
Ndryshe, bazuar në të dhënat që posedon Qendra për Regjistrimin e Bizneseve (QRB) në kuadër të drejtorisë për zhvillim ekonomik komuna e Gjilanit në fund të vitit 2019 kishte të regjistruara 4 mijë e 24 biznese prej tyre mbi 3 mijë biznese aktive dhe veprimtarit kryesore janë tregtia me 54 përqind shërbimi me 29 përqind, prodhimi me 11 përqind dhe ndërtimtaria me 6 përqind derisa kanë qenë të punësuar mbi 9 mijë punëtor.
