Në Kosovë deri më tani janë 2.640 raste aktive me Coronavirus, derisa vendi ynë kryeson listën me më së shumti raste në Ballkan, raporton Front Online.

Lirimi i masave bëri që numri i të infektuarve të rritet, e kjo rritje bëri që Coronavirusi ta prek edhe komunën e Drenasit.

Deri më tani në këtë komunë janë 60 raste aktive me Coronavirus, ku 12 prej tyre janë të hospitalizuar.

Për gjendje e tyre shëndetësore për Front Online, ka folur drejtori i shëndetësisë në këtë komunë, Arsim Haxhiu.

Ai tha se gjendja e tyre shëndetësore është stabile.

“Gjendja me Coronavirus sipas raportit të mëngjesit është se janë gjithsej 60 raste aktive, prej tyre 12 janë të hospitalizuar dhe 48 raste janë nën përkujdesje, 12 raste janë në Kliniken Infektive gjendja e tyre sipas informacioneve është stabile”, ka bërë të ditur Haxhiu për Front Online.

Haxhiu tha se përhapja e Coronavirusit në këtë komunë e ka prekur edhe stafin shëndetësor, ku deri më tani janë të infektuar një doktor dhe tri infermiere.

“Kemi 3 infermierë dhe 1 doktor të infektuar me Coronavirus, QKMF-ja nuk është vatër e infeksionit, personeli shëndetësor kanë qenë në pushim, kur janë kthyer nga pushimi janë testuar dhe kanë rezultuar pozitiv”, tha Haxhiu.

Ditë më parë Qeveria e Kosovës, ka marrë masa shtesë për parandalimin e përhapjes së pandemisë së Coronavirusit, drejtori i Shëndetësisë në Komunën e Drenasit tha se këto masa janë duke u zbatuar edhe nga qytetarët e Drenasit.

“Jemi në fushat vetëdijesuese, kanë filluar mirë t’i përmbahen masave që i ka marrë Qeveria ”,tha Haxhiu./Front Online/