Qeveria e Kosovës ka ndërmarrë një sërë masash të cilat kufizojnë lëvizjen e qytetarëve dhe të bizneseve për të parandaluar përhapjen e Coronavirusit.
Këto vendime duhet të inspektohen nga inspektoratet komunale në koordinim me ato qendrore.
Kështu në Komunën e Ferizajt, sipas zëdhënësit Albion Sherifi, për mosrespektim të masave janë 1253 persona dhe subjekte të cilat janë gjobitur dhe janë proceduar në Gjykatën Themelore të Ferizajt nga Inspektorati Komunal.
“Janë përcjellur për procedurë kundërvajtëse pranë Gjykatës Themelore në Ferizaj, 1253 persona dhe subjekte të cilat nuk e kanë respektuar kufizimin e orarit të lëvizjes dhe mbajtjen e maskës”, ka thënë ai për Front Online.
Ai thotë se që nga vendimi për aplikim të këtyre masave ka filluar inspektimi në teren ku kryesisht gjobat janë për mosvendosje të maskës.
“Ka filluar shpërndarja e gjobave, ka qytetetarë që nuk respektojnë këto masa, kryesisht vendosjen e maskës”, ka thënë Sherifi.
Ai ka treguar se vetëm gjatë ditës së djeshme janë rreth 60 gjoba të shqiptuara për qytetarët që nuk i respektojnë këto vendime të Qeverisë për parandalim të përhapjes së Covid-19.
“Janë afërsisht 60 vendime që janë lëshuar ose gjoba për mosrespektim të sjelljes, përkatësisht shkelje të rregullave gjatë pandemisë, po flas vetëm për dje”, është shprehur Sherifi për Front Online.
Sherifi thotë se inspektimet janë të vazhdueshme në asistencë të Policisë nëpër subjekte afariste si dhe kontrolle nëpër sheshe dhe hapësira publike.
“Po absolutisht, vazhdueshëm ka inspektime së bashku me Policinë edhe nëpër subjekte afariste, por edhe kontrolle të vazhdueshme edhe në shesh edhe në hapësira të tjera publike”, ka thënë Sherifi për Front Online.
