Kryeministri i ri, Zoran Zaev, sot në Qeverinë e Maqedonisë së Veriut zyrtarisht mori postin nga kryeministri i tanishëm teknik Oliver Spasovski.

Në pranim-dorëzimin zyrtar, Zaev duke falënderuar kryeministrin e deritanishëm Spasovski dhe anëtarët e Qeverisë kalimtare për punën e suksesshme gjatë 9 muajve të fundit, tha se kjo Qeveri me guxim dhe sukses është përballur me krizën shëndetësore-ekonomike të shkaktuar nga COVID-19.

Në kushte të ndërlikuara të tilla, siç tha kryeministri Zaev, me sukses u organizuan dhe u zbatuan zgjedhje korrekte dhe demokratike dhe u zgjodh Qeveria e re, transmeton Anadolu Agency (AA).

Zaev po ashtu nënvizoi se shteti do të vazhdojë me proceset reformuese dhe tani ajo është anëtare krenare e Aleancës së NATO-s dhe realizon perspektivën e përcaktuar të Bashkimit Evropian pas marrjes së vendimit për fillimin e negociatave me BE-në.

Duke i dëshiruar punë të suksesshme në pozitën e ministrit të Punëve të Brendshme, kryeministri Zaev i dëshiroi Spasovskit bashkëpunim të frytshëm dhe vazhdim në përballjen me sfidat në këtë dikaster si dhe pjesëmarrje aktive në punën e Qeverisë në miratimin e politikave me interes të të gjithë qytetarëve të Republikës së Maqedonisë së Veriut.