Kryetari i PDK-së Kadri Veseli e ka vlerësuar lart përmirësimin e renditjes së Kosovës për liri të shtypit nga Reporterët Pa Kufi.

Ai ka shkruar në faqen e tij në Facebook se ngritja për pesë vende e lirisë së shtypit vlen të bëhet e ditur në mënyrë të veçantë për siç tha ai “ata politikanë e opinionbërës të Kosovës që karrierën e tyre e kanë ndërtuar duke mohuar, nëpërkëmbur apo shpërfillur arritjet e mëdha të Kosovës”.

“Liria e mediave është një ndër shtyllat themelore të sistemit liberal demokratik që kemi ndërtuar me sukses në këto dy dekada liri. Ne krenohemi që Kosova, edhe pse me sfidat e jashtëzakonshme të rindërtimit pas luftës, të shtetndërtimit pas shpalljes së pavarësisë si dhe të përpjekjeve të parreshtura për të konsoliduar sovranitetin dhe subjektivitetin tonë ndërkombëtar, ia ka dalë të ndërtojë një realitet mediatik të lirë e pluralist më të mirë se shumë shtete që kanë jetëgjatësi shumë më të madhe se yni”.

” Ky fakt vlen të bëhet i ditur në mënyrë të veçantë për ata politikanë e opinionbërës të Kosovës që karrierën e tyre e kanë ndërtuar duke mohuar, nëpërkëmbur apo shpërfillur arritjet e mëdha të Kosovës. Vlen për të përgënjeshtruar ata që e kanë nxirë e njollosur padrejtësisht shtetin tonë kudo ku kanë folur, brenda e jashtë vendit”, ka shkruar ai.