Vala rekorde e nxehtësisë në Arktik ndezë pyjet e Siberisë

Një valë e nxehtësisë në Siberi të Rusisë ka bërë që ky rajon plot pyje të rrezikohet nga shumë zjarre.

Shifrat nga agjencia Avialesookhrana e Rusisë, agjenci për menaxhimin e zjarreve pyjore, zbuloi se po digjen 1.15 milionë hektarë pyje nëpër rajone ku zjarrfikësit nuk mund të arrijnë.

Rajoni më se keqi i prekur është Republika Sakha, ku gjendet qytetit Verkhoyanks. Në këtë vend më 20 qershor u raportua temperatura rekorde prej 38 gradë celsius, dhe nëse konfirmohet, do të jetë dita më e ngrohtë që është regjistruar ndonjëherë në Arktik, shkruan Independent, transmeton KOHA.

Imazhe të këtij rajoni nga Copernicus Climate Change Service tregojnë Siberinë të mbuluar me një ngjyrë të ndezur të portokalltë dhe të kuqe për shkak temperaturave të larta. Sipas kësaj agjencie, muaji që shkoi ishte më i ngrohti i regjistruar globalisht, ku në Siberi shkoi deri në 10 gradë celsius përmbi normales.

Por temperaturat kanë qenë jashtëzakonisht të ngrohta që nga janari në këtë rajon. Amber Soja nga NASA e cila ka bërë hulumtime në teren në këtë rajon tha: “Në këtë pjesë të Siberisë, shenjat e ndryshimit klimatik tashmë janë këtu dhe po ndodhin. Nuk është diçka nga e ardhmja e largët”.

Arktiku është rajoni që po ngrohet më së shpejti në botë, sa dyfishi i rajoneve tjera. Pos zjarreve, kjo po shkakton edhe degradimin e akullnajave dhe erozionin e brigjeve, duke ngritur alarm dhe brenga për stabilitetin strukturor të rajonit si dhe kafshët që jetojnë atje.

1 abonim, 3 paisje, 240 kanale shqip – NimiTV në gjithë Evropën për vetëm 99.90€ për 12 muaj

Sponsoruar