Zyrtarët e ushtrisë amerikane janë ankuar se një aeroplan luftarak rus i është afruar në mënyrë të rrezikshme një aeroplani vëzhgues amerikan në Detin Mesdhe. Ky është rasti i dytë i kësaj natyre në katër ditët e fundit.

Në deklaratën e ushtrisë amerikane, të publikuar të dielën, nuk saktësohet vendi ku ka ndodhur ky incident, por thuhet se aeroplani rus u afrua në hapësirën e ujërave ndërkombëtare.

Sipas disa faqeve për përcjelljen e fluturimeve, incidenti ka ndodhur në pjesën lindore të Mesdheut, jo shumë larg bregdetit të Sirisë, shkruan “Free Europe”.

Forcat amerikane thanë se aeroplani luftarak rusi i tipit “Su-34” iu afrua dy herë aeroplanit amerikan të tipit “P-8A”, ndërsa herën e dytë largësia mes dy aeroplanëve ishte vetëm tetë metra.

“Afrimi i dytë vlerësohet si i pasigurt dhe joprefesional”, thuhet në deklaratën e ushtrisë amerikane. Një incident i ngjashëm ndodhi edhe më 15 prill po në atë zonë.

Ministria e Mbrojtjes e Rusisë ende nuk ka reaguar zyrtarisht ndaj deklaratës së forcave amerikane.