Presidenti Hashim Thaçi ka folur lidhur me takimin Kosovë – Serbi që do të mbahet në Shtëpinë e Bardhë.

Ai ka thënë se do të angazhohen për marrëveshje përfundimtare, që nënkupton njohje reciproke.

“Në kohën e duhur për Kosovën është takimi që do të organizohet në Uashington, është një takim i munguar por, që po ndodhë për herë të parë në mes të dy vendeve të Ballkanit në Shtëpinë e Bardhë i udhëhequr nga SHBA’ja, gjithmonë kanë qenë jashtëzakonisht inkurajuese letrat e presidentit Trump për të presidentët edhe të Kosovës dhe Serbisë, që të shtyhet procesi i paqes përpara dhe të arrihet marrëveshje përfundimtare që nënkupton njohjen reciproke”, ka thënë ai.

Presidenti thotë se dita e takimit Kosovë – Serbi do të jetë e vështirë dhe rraskapitëse në kuptimin e negociatave me liderët serb.

“Unë besoj që do të jetë një ditë jo e lehtë, jashtëzakonisht e rëndë, shumë e vështirë dhe rraskapitëse në kuptimin e negociatave me Serbinë, ne si Kosovë kemi kërkuar gjithmonë që në tavolinë të diskutimit të jenë Shtetet e Bashkuara të Amerikës, ndërsa tash mund të themi jemi të bekuar që jo vetëm do të jenë po do ta udhëheqin këtë proces, mendoj që është diçka e mirë, një mundësi që na ka munguar, shpresoj që do të punohet intenzivisht që ndërlidhet për çështjet ekonomike por edhe që mund të ndikojë për hapjen e çështjeve tjera”, ka thënë ai për T7.

I pari i shtetit thotë se Serbia ka mbetur peng i së kaluarës, derisa, Kosova ka ecur me hapa progresiv.

“Delegacioni i Serbisë shikon më tepër ka e kaluara, ende vazhdojnë të mbesin peng i së kaluarës miteve të rrejshme historik e për Kosovën kur Kosova ka bërë hapa gjigand progresiv. Është e lirë e pavarur. Realiteti në Kosovë ËSHTË ndryshe nga ajo që pretendon Serbia. Do të ulen dy shtete plotësisht të barabarta, mendoj që do të jetë një ditë jo e lehtë, por e rëndësishme për paqen dhe stabilitetin”, ka thënë ai.