Mediat amerikane raportojnë një zhvillim të ri në lidhje me pandeminë e koronavirusit, ku bëjnë me dije se administrata Trump ka blerë pothuajse të gjithë rezervën që do të prodhohet në muajt e ardhshëm të “Remdesivir”.
Ky ilaç i prodhuar nga kompania “Gilead Sciences”, është i pari i aprovuar nga autoritetet amerikane për t’u përdorur në trajtimin e Covid-19. Përdorimi i tij ka treguar se mund të ndihmojë të sëmurët të shërohen më shpejt nga virusi.
Përmes një deklarate për shtyp, Departamenti i Shëndetit bën me dije se është arritur një marrëveshje e shkëlqyer me Gilead për 500 mijë doza të ilaçit, e cila nënkupton 100% të prodhimit të kompanisë për muajin korrik dhe 90% të prodhimit të muajve gusht e shtator.
