Presidenti i Republikës së Kosovës, Hashim Thaçi, në mënyrë të vazhdueshme ka drejtuar kritika në adresë të emisarit të BE’së, Miroslav Lajçak. Në një konferencë për media të mbajtur të martën, Thaçi ka thënë se nuk do të pranojë që të bashkohet në një proces negociatash të cilin do ta drejtonte sllovaku.

E ndaj një deklarate të tillë ka reaguar ashpër politikania serbe, Rada Trajkoviq, duke thënë se Lajçakun po e kundërshton një lider politik që është votuar nga një legjislaturë e vjetër dhe që partia e tij në zgjedhjet e fundit ka dalë e treta.

Madje Trajkoviq ka shkuar edhe më tej duke thënë se presidenti Thaçi “është duke u përballur edhe me aktakuzë për krime lufte”, raporton Gazeta Express.

“Këtu është një lider i votuar në detyrë nga parlamenti i vjetër, partia e të cilit u rendit në vendin e 3-të në zgjedhjet e fundit dhe i cili po përballet me një aktakuzë për krime lufte nga Dhomat e Specializuara të Kosovës”, ka shkruar Trajkoviq.

Në fund Trajkoviq ka pyetur se si një lider sikurse Thaçi refuzon Lajçakun dhe vë në pikëpyetje legjitimitetin e dialogut të drejtuar nga Brukseli.

“Dhe një udhëheqës i tillë guxon të refuzojë z.Lajçak dhe të vërë në dyshim legjitimitetin e dialogut të udhëhequr nga BE?”, ka përfunduar ajo.

Lidhur me deklarimet e djeshme të Thaçit për Lajçakun nuk kanë pranuar të flasin nga Brukseli.

Here is a leader voted into office by the old parliament, whose party came in 3rd at the latest election & who is facing an indictment for war crimes by the Kosovo Specialist Chambers.

And such leader dares to dismiss Mr Lajcak & question the legitimacy of the EU-led dialogue? https://t.co/lwTt0C2DGC

— Rada Trajkovic (@trajkovic_rada) May 27, 2020