Me bilbila dhe me shpalosjen e panove të ndryshme, një grup i qytetarëve të Novi Pazarit ka protestuar të shtunën. Ata kanë kërkuar të vërtetën e plotë për të vdekurit dhe të infektuarit me COVID-19 në Sanxhak, regjionin në Serbi, në afërsi të Kosovës.
Protestuesit po ashtu kanë kërkuar ndërrimin e shtabit të krizës, zëvendësimin e koordinatorit të spitalit, Mirsad Gjerlek dhe hetime për shpenzimin dhe përdorimin e donacioneve të shumta nga Serbia dhe vendet tjera.
Rreth 50 protestues kanë mbajtur pano në të cilat është shkruar “të përgjegjshëm para ligjit” “lista e donacioneve”, “pse faleminderit Vuçiq?”, “faleminderit diasporë”…
Ata i kanë bërë thirrje Gjerlekut që të del para njerëzve dhe të sqarojë veprimet e tij. Ka pasur thirrje edhe kundër presidentit të Serbisë, Aleksandar Vuçiq.
Protestuesi Aladin Pauçinc ka thënë se Sanxhakun e ka shpëtuar diaspora me donacionet e saj e jo Vuçiqi. Sipas tij protesta është organizuar pas pakënaqësive të qytetarëve.
Në spitalin në Novi Pazar, qytetin në kufi me Kosovën të banuar kryesisht me boshnjakë, kanë vdekur 154 pacientë prej fillimit të pandemisë. 100 kanë vdekur nga pasojat e COVID-19, ndërsa për 54 persona është raportuar se kjo sëmundje nuk ishte burim i menjëhershëm i vdekjes. Qytetarët vlerësojnë se numri i të vdekurve mund të ketë qenë edhe më i madh. Novi Pazari ishte shumë i goditur nga koronavirusi. Një kohë pacientët janë shëruar në korridoret e spitalit.
