Presidenti i vendit Hashim Thaçi në një konferencë për media, ka mbështetur arritjen e marrëveshjes në mes të Kosovës dhe Serbisë në Uashington, raporton Front Online.

Ai ka falendëruar SHBA-të dhe ish-presidentët amerikan që e mbështetën Kosovën në rrugën drejt pavarësisë.

Thaçi theksoi se pa mbështetjen e tyre, Kosova nuk do të ishte ku është tani.

“Në të gjitha takimet që kam zhvilluar me presidentin Trump, ai më ka folur për Kosovën si një vend i mrekullueshëm, Javën e kaluar ishte një konfirmim tjetëri  këtij përkushtimi dhe i kësaj përkrahje. Ndihem i lumtur dhe krenar që pas përpjekjeve dhe punës së përbashkët për më tepër se dy vite me administratën e presidentit Trump, me përkushtim të ambasadorit Grenell, të premten e kaluar arritëm që t`i formalizojmë këto përpjekje”, ka thënë ai.

Tutje presidenti Thaçi, deklaroi që marrëveshja e së premtes ishte përpjekja më serioze e SHBA-ve në këto dy dekada, raporton tutje Front Online.

“Kjo ishte ndërmarrja më serioze diplomatike e SHBA-ve në këto dy deklada për Ballkanin Perëndimor. Gjatë këtij procesi shumë të vështirë, hasëm në vështirësi, akuza, pengesa, konspiracione të shumta, nga shumë anë. Me formalizimin e marrëveshjes në Shtëpinë e Bardhë të gjitha këto u treguan të rrejshme, të paqëndrueshme dhe paragjykuese”, ka thënë ai.

Presidenti foli edhe për pikat konkrete të marrëveshjes.

“Zhvillimi ekonomik, krijimi i vendeve të reja të punës, zhvillimi i mirëqenies qytetare, projektet infrastruktutrote me kapital të madh, autostradat, linjat ajrore e hekurudhore kanë qenë gjithnjë prioritet i Kosovës, njësoj sikurse edhe nevoja për zbardhjen e fatit të të pagjeturve, dhe kthimi i të zhvendosurve në shtëpitë dhe pronat e tyre”, ka thënë ai, duke shtuar se paqja është synimi përfundimtar i Kosovës në këtë proces. /Front Online