Zyrtarët amerikanë në pjesën juglindore të Shteteve të Bashkuara e kanë ngritur alarmin për rritjen e numrit të të rinjve që po dalin pozitivë në testin për koronavirus.

Në Misisipi, zyrtarët thanë se përhapja e virusit te të rinjtë ka ndodhur për shkak të ndejave që organizohen nga studentët, shkruan “CNN”, transmeton Gazeta Express.

Në Karolinën Veriore, guvernatori Roy Cooper tha të premten se rritja e numrit të rasteve po i përfshinë kryesisht personat e moshës 24 deri 49-vjeçare.

Në Teksas, guvernatori Greg Abbott tha javën e kaluar se personat nën moshën 30-vjeçare e përbëjnë shumicën e rasteve të reja në disa rajone. Sipas tij, rritja e numrit të të rinjve të infektuar me koronavirus ka mundur të jetë shkaktuar nga ndejat e organizuara në Ditën e Përkujtimit, nga vizitat në kafene apo nga tubimet e tjera.

Në Florida, guvernatori Ron DeSantis tha të shtunën se rastet janë duke e ndërruar drejtimin nga popullsia që është në të njëzetat dhe tridhjetat.

Ai tha se shumica e të rinjve të infektuar nuk kanë simptoma dhe për këtë arsye nuk kanë nevojë për vëmendje mjekësore.