Kryeministri hungarez Viktor Orbán tha sot se liderët evropianë janë afër fillimit të shqyrtimit të mundësisë së “anëtarëve të Bashkimit Evropian të dërgojnë një lloj trupash paqeruajtëse në Ukrainë” dhe se bota është “aktualisht afër asaj linje që nuk mund të mendohej më parë. Orbán tha se lufta në Ukrainë është “shqetësuese dhe e rrezikshme” dhe se nuk është ekzagjerim të thuhet se ekziston një rrezik real i një lufte botërore.

Orban shtoi se “gjithnjë e më shumë po merren vendime për përdorimin e armëve më të reja dhe më të forta”, dhe se “Perëndimi po i dërgon Ukrainës gjithnjë e më shumë pajisje moderne”. “Ndërsa, nga njëra anë, mund të tingëllojë si një ekzagjerim kur disa liderë evropianë dhe amerikanë thonë se, nëse gjithçka vazhdon kështu, mund të ketë një luftë të tretë botërore, është një rrezik i vërtetë”, vuri në dukje Orbán.

Kryeministri hungarez shtoi se lufta po bëhet gjithnjë e më e përgjakshme dhe brutale, por se numri i vendeve evropiane dhe liderëve që mbështesin paqen nuk është rritur. “Në të njëjtën kohë, njerëzit e Evropës filluan të flasin më shumë për një armëpushim, negociata paqeje, por numri i viktimave po rritet”, shtoi ai.

Orbán vuri në dukje se propozimi i Budapestit për zgjidhjen e krizës në Ukrainë i referohet një armëpushimi. “Parlamenti hungarez do të miratojë një rezolutë që pasqyron qëndrimin tonë, ne kërkojmë paqe dhe armëpushim”, tha Orbán.

Ai shtoi se propozimi hungarez nuk ka të bëjë me atë se çfarë lloj marrëveshjeje paqeje duhet të nënshkruhet, por se ka të bëjë vetëm me një armëpushim.

“Ndërprerja e armiqësive duhet të arrihet. Jetët njerëzore nuk duhet të humbasin më. Sapo të ketë një armëpushim, krijohen shanse për negociata paqeje”, tha Orbán./FrontOnline/