Kryetari i Odës së Infermierëve të Kosovës Naser Rrustemaj ka kërkuar nga Ministria e Shëndetësisë dhe Qeveria e Kosovës që të shpallin urgjent konkurs për infermierë, pasi nevojat janë të mëdha dhe se Kosova është ballafaquar me mungesë stafi gjatë pandemisë Covid 19

Në vazhdën e takimeve që ka zhvilluar me krerët e odave dhe shoqatave të profesionistëve shëndetësorë të Kosovës, kryeministri i Kosovës Abdullah Hoti ka takuar edhe kryetarin e Odës së Infermierëve të Kosovës Naser Rrustemaj.

Në takim ka marrë pjesë edhe ministri i shëndetësisë Armend Zemaj si dhe përfaqësues të odave dhe shoqatave tjera të profesionistëve shëndetësorë.

“Ballafaqimi me virusin COVID19 është sfidë globale dhe sakrificë për secilin që është në vijën e frontit. Bashkë me Ministrin e Shëndetësisë z. Armend Zemaj, takuam përfaqësuesit e shoqatave të profesionistëve shëndetësorë, të cilët që prej fillimit të pandemisë e deri në ditët e sotme janë në krye të detyrës. Atyre u premtuam mbështetje të mëtutjeshme dhe koordinim të ngushtë për të mënjanuar mundësinë e përhapjes së një vale të dytë të virusit”, ka shkruar kryeministri Abdullah Hoti, në rrjetin social.

Ai ka ftuar qytetarët që t’i ndihmojmë ata që janë në vijën e parë të frontit, duke i ndjekur rekomandimet e Institutit Kombëtar të Shëndetit Publik.

Hoti po ashtu ka paraqitur 6 pika të stategjisë për mbrojtje nga koronavirusi, të cilat janë përkrahur nga Oda e Infermierëve të Kosovës, përfaqësues të së cilës kanë shprehur gatishmëri për mbështetjen e realizimit të këtyre pikave.
Kryetari i OIK-ut, Naser Rrustemaj, ka falënderuar infermierët dhe profesionistët shëndetësor për punën që kanë bërë Infermierët gjatë kohës së pandemisë.

Ai ka përmendur në takim me kryeministrin problemet që kanë hasur në fillim të pandemisë sa i përket mjeteve dhe masave mbrojtëse.

“Gjatë pandemisë kemi pasur mungesa të mëdha të stafit Infermieror si dhe kushtet e punës kanë qenë shumë të rënda për Infermierët”, ka shtuar Rrustemaj.
“Kam kërkuar që urgjent të pranohen staf Infermieror në vendet kyëe sië është Klinika Infktive, Emergjenca dhe në gjithë Kosoven sepse sot nuk mund të kemi shërbime cilësore kur një Infermier duhet të përkujdeset për 20 pacientë”, ka thënë Rrustemaj, i cili ka kërkuar që urgjentisht të hapet një konkurs për infermierë.

“Gjithashtu së shpejti do të kërkojmë takim me ministrin e shëndetësisë ku do të shpalosim edhe kerkesat tjera nga OIK”, ka thënë Rrustemaj.
Në anën tjetër, Ministri Armend Zemaj në takimin e Kryeministrit me Odat e profesionistëve shëndetësor dhe ekspertë të fushave mjekësore ka thënë se si rezultat i angazhimit të profesionistëve shëndetësorë, Kosova renditet në mesin e vendeve me vdekshmërinë më të vogël nga COVID 19.

“Të arrihen suksese përballë një pandemie që ka gjunjëzuar edhe sisteme shëndetësore shumë të avancuara, me një sistem shëndetësor si ky i joni që është i brishtë dhe me zbrazëtira të shumta është një sukses i madh, dhe bart mbi vete vulën e përkushtimit profesional të gjitha niveleve të kujdesit shëndetësor, të udhëhequr nga motivi i lartë, profesionalizimi e përkushtimi për ta ndihmuar vendin”, ka thënë Zemaj./Front Online/