Nënkryetari i AAK-së, Muharrem Nitaj i është përgjigjur Lutfi Hazirit për çështjen e ndryshimit të kufijve.

Nitaj në emisionin “Debat Plus” të RTV Dukagjinit ka thënë se deklarata e Hazirit për kufijtë në kohën e tanishme është tërësisht e gabuar.

“Kam respekt për Hazirin por ka bërë një deklaratë tërësisht të gabuar në kontekstin kohorë kur po e thotë. Zoti Haziri duhet të presë që Serbia duhet ta njeh Kosovën në kufijtë aktual. Në momentin kur Kosova dhe Serbia njohën në kufijtë ekzistues, i them zotit Haziri hajde po i hapim letrat dhe po i nxjerrim konopët dhe nëse u përgjigjet palëve të Kosovës dhe Serbisë po bëjmë shkëmbim konop për konop”, tha ai, përcjell Telegrafi.

“Të thuash tani që Kosova nuk humb nëse e jep Leposaviqin dhe 17 fshatra është të mos e kuptosh peshën e çështjes dhe temës. Do të thotë të mos e kuptosh sensitivitetin e hapjes së temës së ndryshimit të kufijve në fazën finale ku ne presim të njihemi nga Serbia. Besoj se kjo do ta kthente gjithë procesin në fillim”, shtoi nënkryetari i AAK-së.

Nitaj thotë se tema e ndryshimit të kufijve tashmë është e vdekur por thotë se nuk e kupton Lutfi Hazirin pse e kthen ende në diskursin publik./