Për dy dekada në Kosovë, janë organizuar shtatë procese zgjedhore. Ndërkohë që këto të 14 shkurtit, të cilat janë edhe të parakohshme, janë të tetat me radhë. Numri më i madh i kandidatëve të certifikuar për të marrë pjesë në zgjedhje ka qenë në vitin 2001, ndërsa më së paku kandidatë ka pasur në vitin 2017.
Në orën 18:00 të së shtunës, ka qenë afati i fundit për dorëzimin e listave me kandidatë për deputetë për certifikim për garën e 14 shkurtit. Janë 28 subjekte politike të cilat kanë dorëzuar listat për aplikim, ndërkaq numri i përgjithshëm i kandidatëve për deputetë të këtyre subjekteve politike është 1079.
Zëdhënësi i Komisionit Qendror të Zgjedhjeve, Valmir Elezi tregn, se sa ka qenë numri i kandidatëve për deputetë gjatë këtyre dy dekadave.
“Gjatë dy dekadave në Kosovën e lirë, janë organizuar 7 procese zgjedhore për Kuvendin e Kosovës. Zgjedhjet e 14 shkurtit janë të tetat me radhë për Kuvend. Gjatë proceseve të kaluara zgjedhore me mijëra kandidatë janë çertifikuar nga Komisioni Qendror i Zgjedhjeve dhe të cilët kanë garuar për ulëse në Kuvendin e Kosovës. Numri më i madh i kandidatëve ka qenë në zgjedhjet për kuvend në vitin 2001 (1 333 kandidatë), ndërsa më së paku kandidat ka pasur në zgjedhjet e vitit 2017 (971 kandidatë)”, thotë Elezi.
Ndërkohë, Elezi flet edhe për numrin e subjekteve politike që kanë marrë pjesë në zgjedhjet për kuvend gjatë këtyre vjetëve. Siç tregon ai, në vitin 2004 ka qenë numri më i madh i subjekteve politike të certifikuar.
“Numri i subjekteve politike që kanë marrë pjesë në zgjedhjet për kuvend gjatë këtyre dy dekadave ka qenë pothuajse i përafërt në çdo proces zgjedhor. Nuk ka pasur dallime të mëdha nga njëri proces zgjedhor në tjetrin. Më së shumti subjekte politike të çertifikuara kemi pasur në vitin 2004 (33 subjekte), ndërsa më së paku në zgjedhjet e kaluara të 6 tetorit 2019 (25 subjekte)”, ka shtuar ai.
Deri të hënën do të dërgohen listat në gjashtë institucione të tjera për verifikimin e këtyre kandidatëve. Ndërsa, më 1 shkurt do të hidhet shorti për renditjen e subjekteve politike në fletëvotimet për zgjedhjet e 14 shkurtit.
