Në Komunën e Skënderajt thonë se kanë bërë të gjitha përgatitjet për të nisur vitin e ri shkollor nga e hëna.
Kryetari i Komunës, Bekim Jashari, ka thënë se Drejtoria e Arsimit në Skënderaj ka marrë të gjitha masat sipas vendimit të Ministrisë së Arsimit dhe nga nesër pritet të nisë mësimi për parashkollorët dhe klasat nga 1 deri 6 dhe 10, kurse klasat 7, 8, 9,11 dhe 12 do të fillojnë mësimin nga java tjetër, me 21 shtator.
“Për të pasur një proces të rregullt të mësimit duke shmangur mundësitë e përhapjes së infeksionit, kemi themeluar task forcën komunale, secila shkollë po ashtu ka të themeluar task forcën, kemi dezinfektuar të gjitha shkollat dhe do të dezinfektohen çdo ditë. Kemi pranuar donacion nga MASH-i maska për nxënësit e komunës sonë, për të cilin donacion falënderoj Ministrin, z. Likaj.”, ka shkruar në Facebook kryetari i Skënderajt.
Jashari ka uruar nxënësit për vitin e ri shkollor, ndërsa ka kërkuar nga ta që të respektojnë rekomandimet e institucioneve shëndetësore për t’u mbrojtur nga COVID-19.
“Nxënës të dashur, si kryetar i Komunës së Skenderajt, ju uroj vitin e ri shkollor 2020-2021, duke ju dëshiruar së pari shëndet në këtë kohë pandemie, suksese në mësime dhe realizim të synimeve tuaja jetësore. Ju lutem shumë që krahas përkushtimit maksimal në mësime, të keni kujdes të veçantë, duke mbajtur maskë dhe duke ruajtur distancën sociale. Apel për prindërit që të punojnë sa më shumë me fëmijët e tyre dhe të përcjellin shëndetin e tyre në vazhdimësi. Përkrahja jonë si komunë, nuk do të mungojë asnjëherë. Urime, nxënës, prindër dhe mësimdhënës, viti i ri shkollor, shëndet e suksese të pa numërta!”, ka shkruar ai.
