Në nderim të 13 punonjësve shëndetësorë që vdiqën si pasojë e koronavirusit, janë ndezur qirinjë në gjitha institucionet shëndetësore.
Organizuar nga Odat e Profesionistëve Shëndetësor, në nderim të jetërave të humbura të mjekëve, infermierëve dhe laborantëve, janë vendosur qirinjë në insitucionet shëndetësore të Republikës së Kosovës si dhe janë fikur dritat në shumë shtëpi private në Republikën e Kosovës.
Ministri i Shëndetësisë Armend Zemaj, pasi vendosi qirinjë tek Klinika Emergjente tha se janë shuar 13 jetë të punonjësve shëndetësorë, përfshirë mjekët, infermierët dhe laborantët që vdiqën si pasojë e virusit Covid 19.
Ai tha se shprehë konsideratën për punën e tyre në shërbim të qytetarëve, në ruajtjen e shëndetit.
“Por fatkeqësisht 13 nga ta pësuan nga virusi Covid 19 dhe ne sot ndajmë dhimbjen dhe njëherit edhe krenarinë për punën e tyre”, ka thënë ministri Armend Zemaj.
Mesin e të vdekurve janë 7 mjekë, 5 infermierë dhe një laborant.
Kryetari i Odës së Infermierëve të Kosovës Naser Rrustemaj, ka shprehur dhimbjen e thellë për jetët e humbura të profesionistëve shëndetësorë.
“Infermierët sikurse edhe punonjësit tjerë shëndetësorë që nga dita e parë janë në ballë të frontit, në luftë për shpëtimin e jetës së pacientëve. Në këtë luftë janë shuar edhe jetët e pesë infermierëve dhe një laboranti, të cilët kanë punuar gjatë tërë jetës së tyre në shërbim të pacientëve”, ka thënë Rrustemaj, kryetar i Odës së Infermierëve.
Edhe qytetarë të shumtë, kanë respektuar thirrjen e Odave të Profesionistëve Shëndetësorë, duke fikur për disa minuta dritat në shtëpitë e tyre nga ora 21, si shenjë respekti për jetët e humbura të punonjësve shëndetësorë.
