As pas 5 tentimeve, Kuvendi nuk ia votoi projektligjin për Rimëkëmbje Ekonomike.

E shefi i ekzekutivit, Avdullah Hoti, nuk priti më.

Në forcën e tij, për t`u dalë në ndihmë bizneseve të prekura nga pandemia Covid-19, vendosi të ndajë 60 milionë euro për to, shkruan Front Online.

Mjetet u dhanë në bazë të listës së punëtorëve që këto biznese deklaruan në dhjetor të 2019 kur nuk kishte virus e as krizë ekonomike në vend.

Me metodën e zgjedhur të kryqeveritarit s`po pajtohet Hekuran Murati i Vetëvendosjes.

“Metoda e tillë është problematike sepse nuk ndihmon punëtorët, gjë që edhe do të duhej të ishte qëllimi, u shpreh ai për Front Online.

Se Hoti nuk veproi drejtë e thotë edhe eksperti i ekonomisë, Musa Limani.

Ai thotë se është dashur të bëhet një listë e re që do të ndihmonte bizneset që janë prekur shkaku i pandemisë.

“Logjikisht nuk është e drejtë. Nuk ka vepruar drejtë. Është dashur të bëhet një listë e re që do të ndihmonte bizneset që janë prekur shkaku i pandemisë. Kështu stimulohen punëtorët që kanë qenë para pandemisë”, u shpreh ai për Front Online.

Nga qeveria, topin për këtë, po e hedhin te Ministria e Financave.

Nga ky dikaster pyetjes nëse pagesat do të duhet të bëheshin karshi ndonjë liste të bërë rishtaz iu përgjigjën me pyetje.

“Kallxom t`i kur është deshtë me e ba”, tha zëdhënësi i Ministrisë, Muharrem Shahini, shkruan Front Online.

Shembulli se si duhej të ndodhte, në Vetëvendosje thonë se veçse ekziston.

“ E në fakt do të duhej të ishte e kundërta – pra të mbështeten punëtorët në mënyrë të drejtpërdrejtë, ashtu siç e ka bërë Qeveria Kurti me Pakon Emergjente Fiskale”.

E që puna të mos vinte deri këtu do të duhej të miratohej projektligji për rimëkëmbje ekonomike, shkruan Front Online.

I tilli kap vlerën e 385 milionë eurove derisa votimi i tij do t’iu mundësonte qytetarëve kontributpagues të tërheqin 10 për qind të mjeteve nga llogaria e tyre në Fondin e Kursimeve Pensionale të Kosovës.